Тендер өткізу қағидалары:
1. Тендер екі кезеңде өткізіледі.
Бірінші кезеңде қатысушылардың өтінімдері Порталда (мемлекеттік мүлік тізілімінің веб-порталы, бұдан әрі – Портал) Қазақстан Республикасы Ауыл шаруашылығы министрінің 2015 жылғы 7 қазандағы № 18-02/896 бұйрығымен бекітілген мемлекеттік орман қоры учаскелерінде ұзақ мерзімді орман пайдалану үшін орман ресурстарын беру жөніндегі тендерлерді өткізу қағидаларына (бұдан әрі – Қағидалар) сәйкес комиссиямен қаралады. Мақсаты – тендер талаптарына және шарттарына сәйкес келетін және тендердің екінші кезеңіне жіберілетін қатысушыларды анықтау.
2. Тендердің екінші кезеңін өткізу күні мен уақыты Порталда кемінде екі қатысушыны екінші кезеңге жіберу туралы хаттаманың жарияланған күнінен бастап бірінші жұмыс күніне автоматты түрде белгіленеді.
Екінші кезеңге жіберілген қатысушылар ЭЦҚ және Портал тағайындаған аукциондық нөмірді пайдалана отырып, оның басталуына бір сағат қалған кезде аукцион залында тіркеледі.
Екінші кезең Портал белгілеген уақытта басталады және келесідей өткізіледі:
1) Екінші кезең басталған сәтте аукцион залында тендер пәні бойынша қатысушылардың баға ұсыныстары көрсетіледі, олар қатысушылардың тендер пәнін Қағидаларға сәйкес шарттарды сақтай отырып сатып алуға келісімін білдіреді және бастапқы баға қалыптастырылады;
2) Екінші кезең басталған сәттен бастап қатысушыға басқа қатысушының ең жоғары ағымдағы бағасын Қағидалардың 43-тармағына сәйкес белгіленген қадамға көтеру мүмкіндігі беріледі;
3) Екінші кезең басталғаннан кейін жиырма минут ішінде ешбір қатысушы ең жоғары ағымдағы бағаны көтермесе, онда бұл бағаны ұсынған қатысушы жеңімпаз деп танылады және тендер өткен болып есептеледі;
4) Егер екінші кезең басталғаннан кейін жиырма минут ішінде аукцион залында бір қатысушы Қағидалардың 43-тармағына сәйкес қадамға көтеру арқылы тендер пәнін сатып алуға ниетін растаса, онда ағымдағы баға белгіленген қадамға артады;
5) Егер ағымдағы баға көтерілгеннен кейін жиырма минут ішінде ешбір қатысушы тендер пәнін сатып алуға ниетін растамаса, онда соңғы болып ниетін растаған қатысушы жеңімпаз деп танылады және тендер өткен болып есептеледі;
6) Егер екінші кезең 17:00-де аяқталған сәтте жеңімпаз анықталмаса, онда соңғы болып сатып алу ниетін растаған қатысушы жеңімпаз деп танылады және тендер өткен болып есептеледі.
Тендер нәтижелері туралы хаттама Портал арқылы қалыптастырылады және өткізу күні ұйымдастырушы мен жеңімпаздың ЭЦҚ көмегімен қол қойылады.
3. Тендер хаттамасы негізінде екі жұмыс күні ішінде жергілікті атқарушы орган мен тендер жеңімпазы арасында Порталда электрондық түрде мемлекеттік орман қоры учаскелерінде ұзақ мерзімді орман пайдалану туралы шарт жасалады.
